سياسة الخصوصية

الطبيب هو المسؤول عن بيانات مرضاه اللي بيسجّلها في البرنامج، ووَصْل بيحفظها ويشغّلها له بس. كل طبيب بياناته مفصولة عن أي طبيب تاني، والفصل ده في قاعدة البيانات نفسها.

• الطبيب والمساعد: الاسم، رقم الموبايل، البريد الإلكتروني، التخصص، بيانات العيادة، والاشتراك والمدفوعات.
• المريض: الاسم، رقم الموبايل، السن، الأمراض المزمنة، الأدوية الحالية، الحساسية، الحمل والرضاعة، الشكوى، العلامات الحيوية، الكشف، الروشتات، والتحاليل والأشعة المرفوعة.
• موافقة المريض: بتتسجّل بتاريخها ونسخة النص اللي وافق عليه.

المريض الجديد بيوافق على التخزين والمعالجة بالذكاء الاصطناعي قبل ما يسجّل أي بيانات صحية، ومفيش تسجيل من غير الموافقة دي.

البرنامج فيه مساعد ذكي بيلخّص شكوى المريض ويقرا التحاليل والأشعة ويساعد الطبيب لما يسأله. عشان كده بعض البيانات بتتبعت لمزوّدين خارجيين لمعالجتها، منهم Google AI Studio وGroq وOpenRouter.

• بعض النماذج المجانية عند المزوّدين دول ممكن تستخدم المحتوى حسب شروطهم، ومش بنقدر نمنع ده.
• النصوص الحرة وملفات التحاليل والأشعة بتتبعت زي ما هي، وممكن يكون فيها اسم أو رقم موبايل.
• المساعد مش بيشخّص ولا بيقترح دوا للمريض أو المساعد. الطبيب بس هو اللي بيسأله، والقرار قراره.

عشان نعرف البرنامج بيتستخدم إزاي ونصلّحه، بنسجّل:

• دقايق الاستخدام اليومية لكل طبيب ومساعد، وآخر استخدام وآخر دخول. بتظهر لمالك البرنامج بس.
• أحداث ثابتة من غير أي بيانات مرضى، زي تأكيد التسجيل، وإضافة مريض، وفتح شاشة، وخطوات المهمة الأولى، وتفعيل إشعارات الجهاز.
• مصدر التسجيل لو جيت من رابط فيه علامة مصدر.

أحداث الاستخدام بتتمسح بعد 180 يوم.

• الطبيب يشوف مرضاه بس، والمساعد يشوف اللي الطبيب سمحله بيه في عيادته.
• مالك وَصْل بيقدر يوصل للحسابات للدعم والصيانة، وحسابه محمي بتحقق بخطوتين.
• صفحة QR بتاعت المريض مش بتعرض أي بيانات متسجّلة على الرقم، لأن أي حد ممكن يكتب رقم حد تاني.

البرنامج شغال على خدمات خارجية للاستضافة وقاعدة البيانات والبريد والإشعارات والتحقق من إن الزائر مش برنامج آلي (Vercel وSupabase وCloudflare Turnstile وغيرهم). بتعالج البيانات اللازمة لتشغيلها بس.

• ملفات التحاليل والأشعة بتفضل محفوظة لحد ما المالك يحدد مدة مسح تلقائي، والطبيب يقدر يمسح أي ملف في أي وقت.
• ملف التحليل أو الأشعة اللي الطبيب أكد قراءته بيتمسح بعد 7 أيام من التأكيد، وتفضل القيم والتقرير المكتوب.
• البرنامج مفيهوش تصدير لبيانات المرضى لحد دلوقتي.

مفيش نسخ احتياطية يومية مضمونة دلوقتي. لو حصل مسح بالغلط أو عطل ممكن ما يبقاش فيه نسخة نرجّع منها، فاحتفظ بنسخة من اللي مهم ليك.

بنبعت للأطباء إشعارات جوه البرنامج وعلى الجهاز وبالبريد عن الاشتراك والتجربة والتحديثات. رسايل التذكير بالرجوع فيها رابط لإلغاء الاشتراك فيها بضغطة.

تقدر تطلب تصحيح بياناتك أو مسحها أو تسأل عن أي حاجة هنا. الطبيب يقدر يتصرف في بيانات مرضاه من حسابه، والمريض يتواصل مع عيادته. وللتواصل معانا استخدم رقم الواتساب المكتوب في الصفحة الرئيسية.