شروط الاستخدام

وَصْل برنامج على الإنترنت لإدارة العيادة: تسجيل المرضى بالـ QR، والطابور والمواعيد، وملف المريض، والكشف والروشتة، والحسابات، ومساعد ذكي بيساعد الطبيب.

• الطبيب المرخّص بمزاولة المهنة، وبيتحمل مسؤولية بيانات حسابه وصحتها.
• المساعد اللي الطبيب بيضيفه، والطبيب مسؤول عن اللي بيعمله مساعده.
• حافظ على كلمة السر ومتشاركهاش. أي حاجة بتتعمل من حسابك على مسؤوليتك.

وَصْل أداة تنظيم ومساعدة. المساعد الذكي بيقدّم احتمالات للطبيب لما يسأله، وده مش تشخيص ولا بديل عن حكمك الطبي. القرار العلاجي وكتابة الروشتة مسؤولية الطبيب لوحده.

بيانات تعارض الأدوية جاية من ملفات بيانات الأدوية اللي في البرنامج بس. لو مفيش بيانات لفحص معيّن، البرنامج بيقولك إنه «خارج قاعدة التعارضات»، ومعناها مش إن مفيش تعارض. راجع مرجعك دايمًا.

• إنت المسؤول عن بيانات مرضاك وعن الحصول على موافقتهم، والبرنامج بياخد موافقة المريض الجديد قبل تسجيل بياناته.
• متسجّلش بيانات مريض من غير علمه، ومتستخدمش البرنامج لغرض غير إدارة عيادتك.
• تفاصيل التعامل مع البيانات في سياسة الخصوصية، بما فيها إرسال جزء منها لمزوّدين خارجيين للذكاء الاصطناعي.

• الحساب الجديد بياخد فترة تجربة مجانية بالمدة المعلنة في الصفحة الرئيسية.
• بعد التجربة الاشتراك بيكون شهري أو سنوي بالأسعار المعروضة وقت الاشتراك. الأسعار ممكن تتغيّر، والتغيير مش بيمس اشتراك لسه ساري.
• الدفع بالتحويل، والاشتراك بيتفعّل بعد ما نراجع التحويل.
• لما الاشتراك ينتهي فيه مهلة سماح 3 أيام الحساب فيها للقراءة بس. بعدها الحساب بيتقفل، وتقدر تدخل وتشوف رسالة التجديد.
• الإضافات (طبيب أو عيادة زيادة) ليها سعر منفصل معلن.

• ممنوع محاولة الوصول لبيانات غيرك، أو تعطيل البرنامج، أو استخدام برامج آلية عليه.
• ممنوع رفع محتوى مخالف للقانون.
• لو الاستخدام بيضر البرنامج أو غيرك، ممكن نوقف الحساب.

بنحاول البرنامج يفضل شغال، لكن مبنضمنش إنه مش هيقف أو يغلط. مفيش نسخ احتياطية يومية مضمونة دلوقتي، فاحتفظ بنسخة من اللي مهم ليك. ومسؤوليتنا في كل الأحوال محدودة بالقدر اللي القانون بيسمح بيه.

تقدر تبطّل تستخدم البرنامج في أي وقت. وإحنا ممكن نوقف حساب خالف الشروط دي. بياناتك بتتعامل بعد الإنهاء حسب سياسة الخصوصية.

ممكن نعدّل الشروط دي، والنسخة الجديدة بتظهر هنا بتاريخ تحديثها، واستمرارك في الاستخدام معناه موافقتك. الشروط خاضعة للقانون المصري.